Politiski puč w Albanskej, mordarska wjećba na sudnistwje w Praze, bitwy pjanych awstralskich wojakow w Jerusalemskich korčmach. Njeličomne běchu wulke a mjeńše podawki w času do a wosrjedź Druheje swětoweje wójny na swěće. Zbliska dožiwi a napisa je serbski žurnalist »z Kamjenskim nosom« a hibićiwym pjerom. Jurij Wićaz bě dwójny eksilant. Wućekny 1919 najprjedy němskej policiji do Prahi jako »dezerter« a pomocnik serbskich prócowarjow wo awtonomiju. Jako Praski wukrajny korespondent rozprawješe z »pulwroweho suda« Balkana. A hdyž poča Hitler za cyłej Europu hrabać, poda so dale do Palestiny. Tule bu bjezposrědny swědk rozwića židowsko-arabskich konfliktow a nastawanja israelskeho stata,

doniž njenawróći so po wójnje zaso do domizny.

Putace, často žortne reportaže serbskeho wšudźebyła Wićaza dadźa nas cuze kraje a ludźi, ale tež zańdźene njeměrne časy znowa dožiwić, jako bychmy sami pódla byli.